ස්වේච්ඡා නාවික හමුදාව

ශ්‍රී ලංකා නාවික හමුදාවේ සිවිල් සමාජයෙන් පන්නරය ලත් ප්‍රධාන හස්ථය ලෙස ස්වේච්ඡා නාවික හමුදාව නම් කළ හැකිය. ජාතික අවශ්‍යතාවයන් වලදී හා ව්‍යසනයන්හිදී සිය නාවික පුහුණුවෙන් ලද පන්නරයන් කැටිව සිය විශේෂ ප්‍රාගුණ්‍ය අවශ්‍ය කටයුතු සඳහා යෙදවීම ස්වේච්ඡා නාවික හමුදාවේ ප්‍රධාන කාර්ය භාරයකි.

1991 අප්‍රේල් 02 දින අංක 656/25 දරණ අති විශේෂ ගැසට් නිවේදනයෙන් දක්වා ඇති පරිදි ශ්‍රී ලංකා නාවික හමුදාවේ සියලු අංශ නියෝජනය වන පරිදි නිලධාරීන් හා නාවිකයින්ගෙන් සම්පන්න හමුදාවක් ලෙස ස්වේච්ඡා නාවික හමුදාව දැක්විය හැකිය.


දැක්ම

ශ්‍රී ලංකාවේ ඒකීයභාවය සහ භෞමික අඛණ්ඩතාවය ආරක්‍ෂා කර ගැනීම පිණිස කැපවීමෙන් කටයුතු කරන, ශ්‍රී ලංකා නාවික හමුදාවට සිය හැකියාවන්ගෙන් සහ පුහුණුවෙන් ලද ආභාශයෙන් එම අරමුණු සාක්‍ෂාත් කරගැනීම සඳහා සහාය වීම.

මෙහෙවර

නාවික හමුදාවේ කාර්යභාරය ඉටුකිරීමෙහිලා කටයුතු කරන ශ්‍රී ලංකා නාවික හමුදාවට විවිධ ක්‍ෂේත්‍රයන් ඔස්සේ ලබා ගත් සිය විශේෂ ප්‍රාගුණ්‍යයෙන් අවශ්‍ය සහාය දැක්වීම.

පුහුණුව

සක්‍රීය සේවයේ යෙදී නොසිටින ස්වේච්ඡා නාවික පුද්ගලයන් මසකට වරක් පවත්වන සති අන්ත පුහුණු කඳවුරු සහ නාවික හමුදාපතිගේ නිරීක්‍ෂණය යටතේ පවත්වන වාර්ෂික පුහුණු කඳවුරු වලට සහභාගී විය යුතුය. සක්‍රීය සේවයේ නොසිටින ස්වේච්ඡා නාවික පුද්ගලයන්ගේ දැනුම සහ හැකියාව යාවත්කාලීන කරනු පිණිස, ස්වේච්ඡා නාවික හමුදා මූලස්ථානය මගින් පහත සඳහන් පුහුණු වැඩසටහන් ක්‍රියාත්මක කරනු ලැබේ.

* සති අග පුහුණු කඳවුරු - සෑම මසකම තුන්වන සති අන්තයේ

*වාර්ෂික පුහුණු කඳවුරු - සෑම වසරකම ජනවාරි මස

 
 
ඉතිහාසය

ස්වේච්ඡා නාවික හමුදා ඉතිහාසය ශ්‍රී ලංකා නාවික හමුදා ඉතිහාසයෙන් වෙනස් නොවේ. මෙහි දී Ceylon Naval Volunteer Force සහ Ceylon Royal Naval Volunteer Reserve වල ඉතිහාසය දෙස අවධානය යොමු කිරීමෙන්, ස්වේච්ඡා නාවික හමුදාවේ ආරම්භය පිළිබ‍‍‍ඳ අදහසක් ලබාගත හැකිය. 1937 සංස්ථාපනය කරන ලද “ස්වේච්ඡා නාවික ආරක්‍ෂක බලකාය” පනත ප්‍රකාරව Ceylon Naval Volunteer Force පිහිටුවන ලදි. කොමාණ්ඩර් WG බ්‍යූචෑම්ප් සහ තවත් නිලධාරීන් 12 දෙනෙකු සහ නාවිකයන් 18 දෙනෙකු එහි ආරම්භක සාමාජිකයන් විය. 1938 සහ 1939 යන වසර වලදී නාවික සංඥා සහ අවි යන අංශ වලට අයත් නාවික කණ්ඩායම් බඳවාගෙන ඔවුනට පුහුණුව ලබා දෙන ලදි.

1939 ජූනි 14 වන දින නව (CNVF) මූලස්ථානය විවෘත කිරීම අමාත්‍ය DS සේනානායක මහතා විසින් සිදු කරන ලදි. 1939 ජනවාරි 11 වන දින CNVF මූලස්ථානය ප්‍රථම වරට කොච්චිකඩේ ප්‍රදේශයේදී ස්ථාපිත කළ අතර, එය සිදුවූයේ දෙවන ලෝක යුද්ධය ආරම්භයට දින දෙකකට පෙර වීමද විශේෂත්වයකි. ත්‍රිකුණාමල සහ කොළඹ වරායන්ගේ ආරක්‍ෂක කටයුතු තර කිරීම පිණිස CNVF යොදවා ගන්නා ලදි. පසුව 1943 ඔක්තෝම්බර් 01 වන දින බ්‍රිතාන්‍ය නාවික හමුදාව විසින් CNVF සිය භාරයට ලබාගෙන එය Ceylon Royal Naval Volunteer Reserve ලෙස නම් කරන ලදි. මිත්‍ර හමුදා යුධ ජයග්‍රහණය ලබා ගැනීමත් සමගම CRNVR නැවත ලංකා රජයට 1946 වසරේදී භාර කරන ලදි.

මේ අතර RCVF (1950 නාවික හමුදා පනතේ 34 වගන්තිය ප්‍රකාරව) 1952 ඡනවාරි මස 09 වන දින ප්‍රතිස්ථාපනය කරන ලදී.මේ අනුව මෙතෙක් කලක් සක්‍රීය සේවයේ නොයෙදුණු CRN VR නිලධාරින් සහ නාවිකයින් පෙර සඳහන් නාවික හමුදා පනත අනුව Royal Ceylon Volunteer Naval Force ආරම්භය සනිටුහන් කරන ලදී. නව යුගයක ආරම්භය සනිටුහන් කරමින් 1972 මැයි 22 වන දින ලංකාව ඡනරඡයක් බවට පත්වුනි.එයි ප්‍රතිඵලයක් ලෙස RCV NF ශ්‍රී ලංකා ස්වේච්ඡා නාවික හමුදාව ලෙස නම් කෙරුණි.

 
 
 
නිලධාරින්

රාඡ්‍ය හෝ ‍පෞද්ගලික අංශයේ කාන්තා සහ පිරිමි වෘත්තිකයන් ගෙන් නියමිත අධ්‍යාපනික සුදුසුකම් වලින් පොහොසත් අයවලුන් හට අධිකාරියට පත් නිලධාරියෙකු/නිලධාරිනියක ලෙස ශ්‍රී ලංකා ස්වේච්ඡා නාවික හමුදාවට සම්බන්ධ විය හැකිය.ඔවුන්ට විධායක,වෛද්‍ය,විදුලි,කාර්මික, විද්‍යුත්,ඉංඡිනේරු සහ තොරතුරු තාක්ෂණ යන අංශයන්ගෙන් ස්වේච්ඡා නාවික හමුදාව සමග සම්බන්ධ විය හැකි අතර සිය සිවිල් වෘත්තියේ නියැලෙමින් හමුදා සේවයට සිය දායකත්වය ලබා දිය හැකිය. එසේම ඔවුන්ගේ සේවය අවශ්‍ය අවස්ථාවන් හිදි ඔවුන් හමුදා රාඡකාරි සඳහා කැඳවනු ඇත. ස්වේච්ඡා නාවික හමුදා සාමාඡිකයින්ට සිය සිවිල් වෘත්තියෙන් සියලුම වරප්‍රසාද භුක්ති විදීමට නීතියෙන් ඉඩකඩ වෙන් වී ඇත.

 
 
 
නාවිකයින්

ස්වේච්ඡා නාවික හමුදාවට බැඳීමට කැමැත්තෙන් සිටින නාවිකයන්ට නාවික හමුදාවේ ප්‍රධානතම අංශය ලෙස සැලකෙන යාත්‍රික අංශය වෙත (Seaman branch) ඇතුළු ඕනෑම අංශයකට සම්බන්ධ විය හැකිය.වසර 5ක සේවා කාලය අවසානයේ ඔවුන් නැවත සේවයට බැඳීම සිදු කළ යුතු අතර, සිය අවශ්‍යතාවය පරිදි සක්‍රීය සේවයෙන් මිදී නිවාඩු මත සිටීමට අයදුම් කළ හැකිය. ස්වේච්ඡා නාවික හමුදා පුද්ගලයින්ට නිත්‍ය නාවික හමුදා පුද්ගලයින් හා සමාන වැටුපක් සහ විශ්‍රාම වැටුපක් හිමි වේ.එසේම සක්‍රීය සේවයේ නිරත කාල සීමාව පදනම්ව ඔවුන්ගේ ඡ්‍යෙෂ්ඨතාවය තීරණය වේ.

තවද සිවිල් ඉංඡිනේරු, යාන්ත්‍රික, ඉංඡිනේරු, විදුලි හා ව්ද්‍යුත් හා තොරතුරු තාක්ෂණ යන අංශවලින් මෙන්ම විශේෂ ක්‍රමය යටතේ නාවික හමුදා ස්වේච්ඡා අංශය හා සම්බන්ධ විය හැකි අතර, ඉහත සඳහන් කළ සියලු වරප්‍රසාද හා දීමනාවලට ඔවුන් හිමිකම් ලබයි.