චරිතාපදානය
බානගොඩ ආරච්චිගේ කාංචන සිලාන් ප්‍රියංක බානගොඩ, බණ්ඩාරවෙල ශාන්ත තෝමස් විද්‍යාලයේ සහ බණ්ඩාරවෙල මද්‍ය මහා විද්‍යාලයේ දීප්තිමත් ආදි ශිෂ්‍යයෙකි. 1989 වර්ෂයේ සැප්තැම්බර් මස 15 වැනි දින 19 වන ශිෂ්‍යභට නිලධාරී බඳවා ගැනීමට අයත් ශිෂ්‍යභට නිලධාරියෙකු වශයෙන් ශ්‍රී ලංකා නාවික හමුදාවේ විධායක අංශයට එක්වි ඇති ඔහු, ත්‍රීකුණාමලය නාවික හා සාගරික විද්‍යාපීඨයෙන් මූලික පුහුණුව සාර්ථක ලෙස අවසන් කර, පුහුණු කාලසීමාවේදී විදහා පෑ විශිෂ්ඨත්වය හේතුවෙන් එක්සත් රාජධානියේ ඩාට්මත් නාවික විද්‍යාපීඨය (Britannia Royal Naval College – Dartmouth UK) වෙතින් අන්තර්ජාතික මධ්‍ය නිලධාරී පුහුණු පාඨමාලාව සාර්ථකව සම්පූර්ණ කර, 1991 වර්ෂයේ උප ලුතිනන් වරයෙකු වශයෙන් අධිකාරියට පත් වී ඇත.
සිය උප ලුතිනන් තාක්‍ෂණික පාඨමාළාව 1994 වර්ෂයේදී නාවික හා සාගරික විද්‍යාපීඨය වෙතින්ද, දියයට මුහුදු සංග්‍රාමික දීර්ඝ පාඨමාලාව (Anti-Submarine Warfare - ASW) ඉන්දියාවේ කොචි හී පිහිටි ඉන්දීය නාවික නෞකා වෙන්දුර්තිහී දියයට මුහුදු සංග්‍රාමික පුහුණු පාසල වෙතින්ද සාර්ථකව හදාරා ඇත. එමෙන්ම, බංගලාදේශ අණ හා මාණ්ඩලික විද්‍යාලයෙන් 2009 වර්ෂයේදී අණ හා මාණ්ඩලික පාඨමාලාව සාර්ථකව සම්පූර්ණ කරන ඔහු, 2019 වර්ෂයේදී ඕස්ට්‍රේලියාවේ වොලොන්ග්ගොන්ග් විශ්ව විද්‍යාලයෙන් සමුද්‍රීය ප්‍රතිපත්ති පිළිබඳ ශාස්ත්‍රපති උපාධියද, 2022 වර්ෂයේදී ජාතික ආරක්ෂක හා උපායමාර්ගික අධ්‍යනය පාඨමාලාව, කොළඹ ජාතික ආරක්ෂක විද්‍යායතනය වෙතින්ද සාර්ථකව හදාරා ඇති අතර, කළමනාකරණය පිළිබඳ ශාස්ත්‍රවේදී උපාධිය හා ව්‍යාපාර පරිපාලන ශාස්ත්‍රපති (මානව සම්පත් කලමනාකරණය) උපාධිය ශ්‍රී ලංකා විවෘත විශ්වවිද්‍යාලය වෙතින් හදාරා ඇත.
සිය වසර 34 කට අධික නාවික හමුදා සේවය තුල ශ්‍රී ලංකා නාවික හමුදාවේ වේග ප්‍රහාරක මුර යාත්‍රාවන්හි අණභාර නිලධාරී ලෙස සහ ශ්‍රී ලංකා නාවික හමුදා නෞකා හා ආයතනයන්හි අණදෙන නිලධාරී වශයෙන්ද කටයුතු කර ඇත. සිය සේවා කාලය තුල නාවික හා සාගරික විද්‍යාපීඨයේ නිලධාරී උපදේශක වශයෙන් දෙවතාවක්ද, කොතලාවල ආරක්ෂක විශ්ව විද්‍යාලයේ උපදේශක නිලධාරී වරයෙක් වශයෙන්ද සහ සපුගස්කන්ද ආරක්ෂක සේවා අණ හා මාණ්ඩලික විද්‍යාලයේ උපදේශක කාර්යය මණ්ඩලයට අනුයුක්තව දෙවතාවක්ද කටයුතු කර ඇත. එමෙන්ම, නියෝජ්‍ය අධ්‍යක්‍ෂ නාවික පුහුණු, නාවික හා සාගරික විද්‍යාපීඨයේ පුහුණු කපිතාන්, සපුගස්කන්ද ආරක්ෂක සේවා අණ හා මාණ්ඩලික විද්‍යාලයේ පුහුණු කණ්ඩායම් ප්‍රධානී, අධ්‍යක්‍ෂ නාවික පුහුණු, වැඩබලන අධ්‍යක්‍ෂ ජෙනරාල් පුහුණු, ගිණිකොණ නාවික විධානයේ ආඥාපති (පානම), උතුරු මැද නාවික විධානයේ ආඥාපති (තලෛයිමන්නාරම), උතුරු නාවික විධානයේ ආඥාපති (කන්කසන්තුරෙයි) සහ නැගෙනහිර නාවික විධානයේ ආඥාපති (ත්‍රිකුණාමාලය) වශයෙන් කටයුතු කර ඇති වයිස් අද්මිරාල් කාංචන බානගොඩ, ගරු ජනාධිපති තුමා විසින් ශ්‍රී ලංකා නාවික හමුදාවේ 26 වන නාවික හමුදාධිපති වශයෙන් 2024 දෙසැම්බර් මස 31 දින පත් කිරීමට පෙර, 2024 වර්ෂයේ අගෝස්තු මස 16 දින සිට නාවික හමුදා මාණ්ඩලික ප්‍රධානී වශයෙන් කටයුතු කර ඇත.
ඔහුගේ නිර්භීතභාවය වෙනුවෙන් රණ සූර පදක්කම ද, අගනා සේවය නොකැළැල් චරිතය සහ රාජකාරියට කැපවීම වෙනුවෙන් උත්තම සේවා පදක්කම ඇතුළු සේවා පදක්කම් වලින් පිදුම් ලබා ඇති වයිස් අද්මිරාල් කාංචන බානගොඩ, ශ්‍රී ලංකා නාවික නෞකා සයුරළ නෞකාව මඟින් ගැඹුරු මුහුදේ සිදුකල මත්ද්‍රව්‍ය විශාල තොගයක් රැගත් යාත්‍රා තුනක් එම යාත්‍රාවන්ගේ කාර්යය මණ්ඩලය සමඟ අත්අඩංගුවට ගැනීමේ මෙහෙයුම වෙනුවෙන්, නාවික හමුදාධිපති විසින් ඔහුගේ සේවය ඇගයීමට ලක්කර ප්‍රශංසාව පිරිනමා ඇත.
වයිස් අද්මිරාල් කාංචන බානගොඩ, එක්සත් රාජධානියේ නාවික ආයතනයේ සාමාජිකයෙකු වශයෙන් සේවය ලබාදෙන අතර, මුළු දිවයින සඳහා සාමදාන විනිශ්චයකාරවරයෙක් ලෙස පත් කර ඇත. රැකට් ක්‍රීඩා ඉසව්, සංචාරය කිරීම, ගවේෂණය කිරීම, ඡායාරූපකරණය, කියවීම සහ සංගීතය ඔහුගේ විනෝදාංශ වේ. වයිස් අද්මිරාල් කාංචන බානගොඩ අනූෂා මහත්මිය සමඟ විවාහ වී සිටින අතර ඔවුන් දෙපලට දියණියක සහ පුතෙකු සිටියි.